Nyuma yo gukubita akanakura umugore we 2,umuraperi Jay Polly yakatiwe amezi 5 y'igifungo

Kuwa Gatanu tariki 24 Kanama 2018 mu rukiko rw'ibanze rwa Kacyiru nibwo hasomwe urubaza rwaregaga Tuyishime Joshua uzwi ku mazina ya Jay Polly waregwaga gukubita no gukomeretsa ku bushake umugore we ndetse akanamukura amenyo 2.Jay Polly yahanishijwe igihano cy'amezi atanu y'igifungo.

Iki gihano kije nyuma y'aho ubushinjacyaha bwari bwamusabiye igifungo cy'imyaka ibiri n'ihazabu y'amafaranga ibihumbi ijana (100,000Frw). Mu kwiregura, Jay Polly yemeye icyaha ndetse agisabira imbabazi ibi byatumye yari yahawe igihano cy'umwaka umwe n'urukiko.Bitewe n'uko yaburanye asaba imbabazi ndetse akihutira kwiyunga n'uwo yakoreye icyaha ari we umugore we ndetse agatangira kumuvuza n'ubu akaba akimuvuza, urukiko rwagabanyirije igihano Jay Polly rumuhanisha igfungwa amezi atanu gusa.

Nk'uko umucamanza wasomaga uru urubanza yabikomojeho ngo kuba yarireguraga avuga ko yakubise umugore we kubera ubusinzi ntabwo ari byo byashingirwaho agirwa umwere, cyane ko umusinzi atabona imbaraga zo kurwana, ariko kandi bijyanye n'uko ari ubwa mbere yari ajyanywe imbere y'ubutabera ku cyaha nk'iki ndetse akaba yaraburanye asaba imbabazi, byatumye agabanyirizwa igihano ahabwa amezi atanu y'igifungo.